出席約會無話題點算？
Facebook
WhatsApp
歡迎分享，請列明出處
原先呢個主題主要係文章：預備「約會太緊張點算」既內容分拆出來的，因為寫下寫下原來都幾多內容，而約會話題呢一部份其實都幾多弟兄姊妹會問到，特別係一啲比較慢熱內儉既弟兄姊妹，如果同一位未熟絡既朋友見面，唔多唔少都會擔心無話題，同埋太過緊張，最怕會dead air…，又會怕自己講既內容唔適合。
無話題不用有壓力
有時遇上Dead air都唔駛太有壓力既，因為無話題時有發生，特別對住未熟絡既人，如果無話題，其實正常對方唔會怪您，有時適當既安靜都好正常，反而可能佢都憂慮緊佢自己無話題。
不過唔好咁大壓力都好，去之前自己都可以準備定啲話題，當真係遇上氣氛尷尬，或者過長Dead air時都可以有啲話題講下。
約會前預備話題 可以從以下入手
想搵合適話題可以從幾個方法入手，包括以下
約會前搵定共同興趣作為話題
係配對約會見面之前，雙方基本上都已經對對方既基本資料有啲掌握，呢個時候可以睇下主要興趣個部份，睇下對方同自己有既共同興趣 (呢種係比較理想)，大家可以就住呢方面既話題去發揮，因為自己鍾意又有經驗，分享會比較自然及容易有共鳴，理想既就係如果大家係呢個興趣入面遇到類似發生既事，更容易投入話題。
約會前諗定大眾興趣
正如頭先所講，約會前大家都掌握左對方一啲基本資料，如果無特別共同興趣，都可以留意一下對方既興趣入面，對您黎講比較好奇既部份，或有啲認識既部份。除此之外，都可以講下大眾消閒既內容，例如飲飲食食，鍾意食咩國家既菜、有無諗住旅行、鍾意咩國家、有無睇電影、最近有啲咩展覽、做運動等等等等….
與時事熱話相關話題需要注意內容
除左興趣其實未必夠，呢個時候可以大家講下啲時事熱話，內容最好係個種無咩唔同角度既事非對錯比較好，黑同白分明一啲，呢一種可以避免大家有唔同既角度時，影響溝通氣氛，當然成熟既人本身理性討論問題係無問題，但若然大家想法有唔同，有機會令對方產生大家唔夾既假象，一個人如果有思想，係呢啲話題入面，唔會每一件事都有一模一樣既想法，因為都關乎個人經歷、睇事物角度….等，但唔代表唔夾，有機會再講，避免離題。
可以講既時事熱話既例子，例如最近就有關於土耳其地震新聞，咁啱我呢兩日睇到一篇關於一位老人被埋超過二百多小時後被獲救呢件事，就可以有一個話題。
不過不過….您唔好就咁直接同佢講呢一句野就停喎，如果對方本身唔係一個健談既人，停左係度分分鐘衰過唔講，建議內容講多少少個人感受。例如可以講成，今日睇新聞，見到有個老人竟然可以捱到二百幾個鐘，之後獲救，如果俾著我可能一半時間都捱唔到，好佩服個位老人家，為佢感恩等，加少少感受去表達，再睇下對方反應。又或者呢個時候都可以反問下佢，如果係佢被埋佢會點。假設您發現對方無咩回應或延續，未必佢無感受，可能唔識應您，咁您又可以又講下一啲比較有趣既話題。
留意附近環境借題發揮
可以借在附近環境有無話題發揮，假設進餐既話，就可以講下啲菜式，好唔好味？擺盤靚唔靚？又或者環境好唔好，有無去過呢度食，又或者多唔多黎呢頭。如果行緊街係商場好多店舖都一樣可以借物發揮一下，例如傢俬、精品等等。戶外又可以講下天氣….等等等等，麻煩大家自己做功課自己諗下。
信仰分享
係1+1進行約會配對，大家都係基督徒，所以有信仰分享都好正常好合理。不過有時發現到一啲情況，如果信仰話題分享過多，意思係佔既比例太多，會有少少反效果。例如成餐飯不停讚美主，又或者不停將所有事情拉到去信仰，好似返左去小組分享咁。雖然從心而發既讚美係好事黎，但約會時都盡量集中返唔同部份既分享，唔好將所有野都拉到去信仰層面。
溝通時語速及聲線重要性
另外同話題無直接關係，不過係溝通舒適度上係會有啲關係。語速、聲線其實都好重要。
說話速度太快
說話語速過快，同對方語速唔平衡，即係您快佢慢就需要注意。如果您快對方都快，大家既速度差唔多都還好，經驗上係可接受。但如果您講得快，對方反應同語速同您原來有距離，咁就要留意下，對方聽唔慣係會幾唔舒服的，有時講到一啲興起既話題，更加會不自知，越講越快。
聲線音調高 / 咬字唔清楚 ＋ 說話速度快＝致命
如果講野速度快，而天生聲線比較高音既話 (有少少尖個種)，都真係都幾有殺傷力，其次仲有講野太lur，咬字唔清楚，呢個呢不同既組合加埋對方會聽得好辛苦。
高音 + 語速快 ＝ 好似平時睇片快播咁，支支咋咋感覺
語速快 + 咬字唔清＝對方聽得好辛苦
以上情況聽既時間一長，真係會頭痛 (起碼我係)。
如果係天生把聲比較尖，試下刻意練習壓低少少把聲，同講慢少少。可能有啲弟兄姊妹聽到我咁講就會覺得，下！講左咁多年野點改？係有啲難既，俾啲時間試下同習慣一下，試過有啲會員有呢種情況，我都會提，記得有一次同其中一位會員講呢個題目，因為嗰位會員正正有呢種情況，傾傾下某個話題佢好投入，對方突然講得好快同幾高音。後來了解返，佢原來已經有學緊呢一方面既改善，所以個刻我先知原來坊間都有呢類課程，有需要大家可以自己搵下。
不知自己說話速度快定慢
大家如果唔知自己有無呢個情況，或懷疑自己有呢個情況，可以用手機錄下自己把聲再聽返，感受下自己把聲。速度方面，如果您平均說話速度1分鐘入面，大約係130-160左右都係可接受。呢個字數係俾大家有少少參考，唔係一個最專業既計算方式。
Ｘ 語速快 -> 放慢講
X 語速快 + 高音 -> 稍微壓壓聲，調整語速
X 語速快 + 咬字唔清 -> 咬正啲字先
最後就係講野好太Chur
講聲唔好意思先，我呢一刻諗唔到個Chur字既書面語係咩字詞，太急速、太壓逼？諗到既弟兄姊妹可以話我知。
講野太快令對方覺得好Chur
太Chur黎講都有唔同原素，感受都係其中一種，同上面語速快同高音有少少似，聽起上黎要聽得好快，好急，聽到前面未消化完又到後面。
講野無停頓位
有啲弟兄姊妹係見面前可能係話題上都有所準備，就好似上面所提到，或者更多。亦有可能本身為人較健談，可以不停講野。但係但係，中間俾啲停頓，等對方可以消化下，回應下，睇下對方反應，唔好一輪咀係咁講，有您講無人講，死亡率都好高。聽唔少，好怕對方係有佢講無人講個啲，注意下。
不停問問題
家陣大家見下面了解下，感受一下相處氣氛，千祈唔好不停單向問問題。其實對方會覺得好攰，適當講下自己感受，問下對方感受，一種互動式比較好。問問題本身都無問題，但唔好不停問， 中間講下其他閒計，有機會再問。不停被問問題，就好似被對方面試咁，好難好享受同埋都會攰。
說話比例適可而止 最重要睇對方反應
說話比例較理想當然係一半一半，不過有啲人本身健談啲，而另一位比較靜啲較多聆聽，比例上調節到7:3其實都唔太大問題。但最重要係睇對方反應。呢部份講過好多次，如果對方望住您只係笑，無其他任何反應，又唔反問您，其實佢只係禮貌上用笑黎回應，唔代表您既話題好幽默或好吸引，要識分返笑係出於禮貌定係會心微笑係好重要，尤其係聽完您講既時候笑，但又周圍望，再唔醒水轉話題好難幫您。因為對方好明顯對您講既內容無興趣。呢個情況比較大機會係您講左同一個話題太耐，又或者不停只講自己野，又係有您講無人講，又係要留意。
預備好既話題 唔駛一次過曬冷既
好好準備左既話題，都要好好掌握使用時間，每個話題都可以係一個大家溝通既段落，可能呢個主題會令到您地有好好既交流，見到對方想講多啲就專注聆聽，仲應該適當回應對方既內容，令人覺得您唔止輸出，亦會輸入聆聽對方，對方都會樂意講多啲。同樣，當對方帶出話題，盡量分享，投入其中。記得既係，您並唔係要交功課表現您有幾健談幾識同人傾計，同好識搵話題。最重要係幫助您同約會對象有個舒服自在既交流。今次講唔晒留返下一次，熟絡左大家係投契既，跟本就自然唔需要諗話題，您地都會有話題。千祈唔好機關槍咁，為左啲話題去影響氣氛。
約會時 對方係話題終極者
當您已經盡左力，但對方每每既回應都係幾好、都係、哦..係啊…等等。遇上呢種情況咁點？只可以同您講，問題不在您，唔好介懷，有啲人的確係比較慢熱，要熟絡左先會願意回應多啲。如果仍然希望同對方有多啲認識，下一次既約會內容可以係有目的性一啲，例如去下展覽，嘉年華，又或者主題公園之類，好既地方就係，唔駛諗太多話題，借外在事物幫助您地熟絡。
當然，如果係經1+1安排既約會，我地都會有一個基本跟進，了解返雙方會面後既印象同埋諗法，咁就等我地跟進就可以啦，唔好太大壓力。
最後 好好享受約會過程
以上都係一啲方法，幫助您係約會時預備好話題。有準備點都好過無準備，諗定一啲話題係有需要個時發揮出黎。其實打下打下仲有好多野講想，但好似真係有啲長，有機會再分享下。今次講住咁多先，願 神賜福您有一個美好既約會。