基督徒搵伴侶 唔應該睇樣？
Facebook
WhatsApp
歡迎分享，請列明出處
基督徒搵伴侶睇樣有無問題？基督徒搵伴侶唔應該睇樣？睇樣就代表佢唔係真心愛您？基督徒配對顧問同您分享基督徒搵伴侶睇樣有無錯？係配對運作上見到既情況又係點？
基督徒搵伴侶應唔應該睇外表？
做配對咁多年，呢個問題幾乎都係姊妹問我，與姊妹會面時偶然都會聽到姊妹講起呢個話題，又或者講開外表打扮時 。通常姊妹既反應有以下幾項：
1. 如果佢係因為你個樣生得靚就鍾意你，即係佢唔係真心鍾意你啦？如果咁既話就唔係合適既伴侶。
2. 做基督徒唔應該著重外表，應該著重內心。
3. 睇樣既人太敷淺。
* 問既姊妹中，較多本身都係唔太著重打扮
其實又唔可以怪姊妹咁講，以普遍黎講 (註明係普遍) 女士搵伴侶係外型要求比起男士本身比重無咁高，女士對伴侶要求較著重個人能力、經濟、溝通方面，所以就會形成姊妹對外表要求既疑惑。
而1+1黎講當然仲有信仰原素，屬靈生命在弟兄及姊妹會再有多一個考慮因素。
究竟基督徒搵伴侶應唔應該睇外表／睇樣？
如果在信仰原則下，無講呢一個＂應該＂或者＂唔應該＂。不過聖經有提到
箴言31:10 才德的婦人誰能得著呢。他的價值遠勝過珍珠。31:11他丈夫心裡倚靠他、必不缺少利益，接著31:30提到豔麗是虛假的。美容是虛浮的。惟敬畏耶和華的婦女、必得稱讚。
作為姊妹又或者弟兄，才德以及敬畏 神更是可貴，呢個聖經講明，所以姊妹其實又無講錯。聖經入面都有多次提到，神係看內心，唔係看外表，亦有提到人是看外貌。
尋找伴侶 外表也有一定重要性
雖則外表唔係最重要，但唔代表唔重要。特別搵伴侶，內心唔係單一既考慮，想有一個長遠既關係，除左品德之外、性格、溝通、相處模式….都有好多磨合係入面，但係係了解對方既習性及性格之前，眼緣都會行先，因為一睇就睇得見，性格特質無咁容易睇到，而且即使說不看外表的姊妹或弟兄 (弟兄由目前為至說外表完全不重要可以唔睇樣唔超過5位)，試想像一下。如果係配對的結果入面，有唔同人既相片，真係不會比較嗎？不看外表的意思，其實不止係靚與唔靚？型與唔型？其實仲有好多原素。舉個例子，即使說對外型不重視的姊妹，見到某些弟兄既照片，可能會有一啲反應，就如，佢個樣有啲惡，佢個樣好似唔夠自信….各式其式……呢啲係咪睇外表？
又相反問一下，一個唔重視外表既人，見到對方有外表唔錯，撫心自問會唔會加分？好啦，當唔加分，都唔會減分？
所以，外型良好本身都有助於 ＂不看外表的弟兄姊妹＂想見對方既機會，有益而無害。
講到呢度，唔同意搵伴侶會看外表的弟兄姊妹明白我的意思嘛？
如果到呢一刻都係覺得外表一啲都唔重要既，而您亦都自問搵伴侶上真係對外表無要求既話，您算係佔比例中少數既人，呢樣野本身好難得，真心正面欣賞您，只係可惜唔係太多弟兄姊妹屬於呢一個情況。
男女對對象外型上普遍要求究竟係點？
咁多年經驗入面，都可以略略分享一下弟兄姊妹對伴侶外型上既要求係點。
以下是以雙方基本要求已經篩選情況下，在相若條件、性格特質的情況下作比較：
外表方面要求，一般較年輕既弟兄姊妹，年齡大概在30或以下左右，外型要求相對比較高，而高既意思係包含靚既原素，例如姊妹鍾意陽光、開朗，有一點潮流；弟兄鍾意小鳥依人、可愛、有甜美笑容，女性化。
在30歲以上的弟兄姊妹開始會以實際些為主要。姊妹普遍希望對方外觀整齊、有打理頭髮等。衣著求其，例如件衫睇落殘舊，幾乎都會扣分。而外表誠實、專業會容易加分；弟兄方面如姊妹有坊間所謂＂靚＂(以弟兄角度，這部份有啲覆雜) 既原素會加分，會提高希望見面意慾。除此之外，姊妹照片較親切、溫和、好看的笑容都有助提高弟兄希望認識的機會。
外表唔係只是＂靚 ＂ 而係能夠令對方願意進一步認識的第一步
如果以單身配對或者係婚姻介紹所呢種途徑，外表絕對係其中一個第一門欖，呢一種方式有別於生活社交與人相處機會，因為您既第一步並唔係同對方以相處為先，就好似公司同事、進修或讀書時期既同學仔、教會既團契…之類，呢一種可能外表未必第一時間吸引到對方，但透過相處時間可以慢慢建立，當然呢一種都會有個期限，通過左一段長時間既話，無發酵到所謂既愛情感覺，通常都難啲突然產生。
我成日都同弟兄姊妹講，配對因為以資料性行先，第一步先篩選，之後睇配對結果部份，外型就佔其中一個第一印象，唔係要好靚女，又或者好靚仔，但外型會俾人一種眼緣感覺，好似衣著或者頭髮太隨意求求其，身型過於肥伴，對方希望見面既機會亦會減低。
提到身型呢部份，特別係姊妹，如果係肥伴的話的確無咁大優勢，唔係要好瘦好Fit既身型，但過胖的確不利於配對，為左增加機會都要注意下呢。當然，如果有特別情況，例如服食某些藥物會令身體容易水腫或肥胖，未能容易處理到，都可以透過衣著進行改善。
打扮不是極端 盲目單一追求既目標
雖然講左好多外表係配對上既重要性，但呢一樣並唔係單一追求既個人提升。如果想有一段良好既交往、婚姻關係，內在真係比起外在更重要。就算生得幾靚都好，隨著時間都會睇厭，有無聽過情人眼裡出西施？應該都聽過掛？大家建立左關係，內在既吸引力係會影響對方看您的外型吸引力，即係話，如果您外表靚，但無內在吸引力，您呢份外在既吸引力其實一路跌緊Watt；但相反黎講，如果您既內在吸引力高，對方會覺得您越睇越靚，關係亦越比較長久。
最後分享經文都係出自箴言：
11:22 婦女美貌而無見識，如同金環戴在豬鼻上。
又講住咁多先，有時間再同大家分享。