睇黎呢位弟兄係約會既時候，可能忽略了一些重要的細節，不過唔代表佢唔好，無得改，只係忽略左留意對方需要，以及需要了解返一啲基本約會禮儀。

通常有呢種情況既弟兄姊妹，比較多見到係獨生子，獨生女，好多時候都係家人體貼環境下成長，亦因為無其他兄弟姊妹，所以比較被照顧個位。但唔代表佢無能力照顧人，只係無人係呢方面指教佢。澄清返，唔代表獨生子獨生女唔識體貼人感受，因為都涉汲家庭環境、教育、生活環境。

其實睇到呢個個案都可以留意到，其實當與別人一齊，不論係約朋友食飯，又或者Dating約會，只要係做任何決定之前，了解一下對方既需求、記得當下並唔係自己一個人。

約會既時候，除左溝通重要之外，相處感覺都好重要，包括顧及對方感受，了解對方既需要，好多細節做到的話，除左對方與您相處時覺得舒服之外，仲可以令對方對您既印象加分，增加約會成功既機會，令對方更願意和您再次約會。用返今次既例子，弟兄無嘗試了解去了解姊妹既喜好同埋需要，就好似點餐咁，一齊溝通餐牌既食物，又可以問下對方想Share食物還是各自點餐等等，呢啲都係溝通既一種。食物到左，假設好似呢次咁，如果姊妹食物未到，或者先等一等，等埋姊妹既餐到左先一齊食，都係風度禮貌既表現；相反，如果係姊妹既食物到左先，都可以同對方講，如果肚餓可以先食又或者怕食物快凍可以先食之類。離開餐廳既時候，一般可以讓姊妹先行，就算自然係自己行先，都唔好一支箭咁，好似得自己一個，顧住後面既姊妹。

以今次例子既改善方式，上面就已經提到。不過相處上，所留意既細節係遠遠多過以上既例子，返去最根源，就係多顧及對方感受，關心或者問下對方既需要，因為與人相處，不論約會、拍拖或者同朋友相處既時候，並唔係自己一個人呢。特別係約會入面，表現出呢啲關心，可以令對方感到被尊重，更樂意和您有多些相處及了解呢。講住咁多先！